Оонньуур дьиэ тутуохха
Тэлгэһэ

Оҕобутун кытта бииргэ


Аныгы саха ыала оҕото сайдарыгар төһө кыалларынан бары өттүнэн хааччыйарга кыһанар. Онуоха тэлгэһэни оҥосторго маннык сүбэлэри биэриэ этибит. Оҕону көмөлөһүннэрэр, холобур, туттар малгыт сахалыы аатын этэн, хайдах оҥорору быһааран, көрдөрө-көрдөрө бииргэ оҥорор ордук туһалаах буолуоҕа.

Оҕо оонньуур сирин күнтэн харыстыырга баҕаналары туруортаан баран тиэнтэ таҥаһынан бүрүйэн кэбиһэбит. Ол эрээри наһаа күлүк сиргэ оҥоһуллубат. Саас хаар хойут ууллар, ардах түстэҕинэ, аанньа куурбат. Сыыр оҥорор буоллахха, сүүрэн кэлэн баран ыттарга миэстэ хаалларыллар. Хачыал курдук тутуулар тулаларыгар сэрэхтээх буолбатын курдук 2 м курдук сир хаалыахтаах. Ол курдук 15 м 2 сир наада буолар. Уопсайынан, Европа ыстандаартын быһыытынан, оҕо былаһаакката оҕо эчэйиитин сэрэтэр сыалтан, 40-50 см халыҥнаах өрүс кумаҕа буолуохтаах. Ол эрээри саамай үчүгэй күөх хонуу буолар. Манна анаан чыычаах отун курдук сымнаҕас оттору үүннэрэллэр эбит.

Сырыылаан түһэр сыыр сырыынньата (аһары туруору эмиэ баар буолааччы), онон-манан уһуга суох гына төгүрүтүллүбүт буолары үчүгэй.

Куйаас күн уунан ысыһан оонньууру оҕолор туохтааҕар да сөбүлүүллэр. Ол курдук ПВХ турбаттан душ оҥоруохха сөп эбит.

Оҕо бэйэтэ көрөр оҕуруот астаах буолуохтаах. Холобур, күөх горох, укроп курдук үүнүмтүө оҕуруот аһа, сибэкки буолуон сөп.

Чөҥөчөк, хаптаһын, дүлүҥ наада буолар. Холобур, устуул, остуол оҕото оҥорорго. Өссө лэкэлэри араас кээмэйдээх гына быһаттаан, охтубакка эрэ хаамарга тэйиччи уурталаан эрчиллэр суол оҥоруохха сөп.

Судургу ньыма – мастар дуу, олбуор, хоспох дуу икки ардыларыгар быа тардан баран, чараас суорҕан сабыытынан бүрүйэ быраҕабыт, аллараа өттүлэрин туттартаан кэбиһэбит.

Подсолнух сибэккилэри үүннэрэн эмиэ дьиэ оҥоруохха сөп эбит. Түргэнник үүнэллэр, улахан баҕайы сиэмэлээхтэр уонна үүннэрэргэ судургулар. Төгүрүччү бэйэ-бэйлэриттэн 10 см буолалларын курдук олордуҥ. 1,5 м курдук уһуннаах гына үүммүттэрин кэннэ үрдүлэрин холботолоон кэбиһэҕит. Киирэр ааҥҥа аһаҕас миэстэ хааллараргытын умнумаҥ. Сибэкки дьиэ бэлэм буолла!
Хаартыскаҕа: үс оҕолоох Станислав уонна Виктория Контоевтар оҕолоругар Айталыынаҕа уонна Туйаарымаҕа анаан туппут оонньуур дьиэлэрэ.
Остуоруйалаһар дьиэ

Наада буолар: дьиэбит атахтарын оҥорорго анаан 100х100 мм кэтиттээх, 3000 мм уһуннаах 8 устуука буруустар, 20х100 мм кэтиттээх, 2500 мм уһуннаах 60 уст. дуоскалар, 20х100 мм кэтиттээх уонна 2000 мм уһуннаах 50 уст., 2000 мм уһуннаах 2 эриэйкэ, 700 мм уһуннаах 5 устуука эриэйкэ.

Остуоруйа кэпсэтэр, оонньуур аптаах-алыптаах дьиэни оҥордоххо, оҕо тылын-өһүн сайыннарарга олус туһалаах буолуоҕа. Маны тэҥэ уруһуйдуурга дуоска туруоруохха эмиэ сөп. Буруустарбыт уһуктарын 30 кыраадыс муннуктуу уһуктуубут. Ол кэннэ пааралыы уурталаан баран, уһуктаммыт сирдэрин суруугунан эрийэн, холботолоон кэбиһэбит. Аллараа атахтарын икки ардылара 3000 мм буоларын курдук оҥоруҥ. Итинник атахтарбыт үөһээ өттүлэрин барыларын биир бурууска туттартыыбыт. Сиртэн 800 мм тэйиччи турар гына эриэйкэлэрбитинэн «ригель» оҥоробут. Ол кэннэ бастакы атахтарбытын туруоран баран, атыттарбытын холботолуубут. Атахтарбыт икки ардылара 1 уонна 2 киэннэрэ 500 мм, онтон салгыы 800 мм буолаллар. Бу кэннэ муостатын оҥоробут, сытыары туорайдарбытыгар (ригель) хаптаһыннарбытын суруугунан туттартыыбыт. Дьиэни тас өттүттэн хаптаһынынан сытыары саайталыыбыт. Иһигэр быыстары оҥортуохха сөп, холобур, иккис атахха саайан. Онно анаан эрдэттэн дьиэбит үрдүгэр сөп түбэһиннэрэн, хаптаһыннары бэлэмнээн сарайын эриэйкэтигэр сурууктарынан туруору туттарабыт. Сарайбытын «харыйалыы» саайабыт, кирилиэс тахсар сирин хаалларабыт. Оҕо үөрэ-көтө оонньуурун курдук, кырааскалаан, ойуулаан-мандардаан биэрэбит.

Хаартысканы https://usamodelkina.ru саайтан туһанныбыт.
Тиэргэҥҥэ көлүйэ оҥоробут

- Маҥнай кумаҕы хаһан, көлүйэбит омоонун дьара өттүн, ортотун уонна дириҥин хаһан оҥоробут.

- Уу анныгар тэлгиир бөлүөҥкэбит кээмэйин суоттубут. Онуоха устатыгар уонна туоратыгар быаны быраҕан кээмэйдиибит. Ол уһунугар 50-нуу см эбэн биэрэбит.

- Көлүйэ тулатыгар 15-20 см³ гына бөлүөҥкэ кытыыларын кистииргэ хаһабыт.

- Онткуйабытыгар 10 см туойдаах кумах кутабыт уонна уунан илитэбит.

- Кумах кытааппытын кэннэ бүрүөһүнү (пленка) харыстыыр сыалтан, балаһалыы «геотекстиль» тэлгэтэбит. Ол кэннэ уһуктарын кырыйан, баран көлүйэ тула хаспыт сирбитигэр кистиибит.

- Бүрүөһүммүтүн тэлгэтэбит, 30 см саппааска хаалларан баран эмиэ хаспыт ханаабабытыгар уган, чай таас (галька) кутан эбэтэр таастары ууран көмөн кэбиһэбит.

- Анал иһиттэргэ олордуллубут үүнээйилэри көлүйэбит кытыыларыгар уурталыыбыт.

Онно балыгы, баҕаны ыытан кэбиһэбит. Кэрэни бэйэҕит илиигитинэн оҥорон, дьоллоохтук олороргутугар баҕарабыт!
Made on
Tilda