От-мас туһатын үөрэтиэххэ
Дьаҥ-дьаһах буулаатаҕына, өбүгэлэрбит оту-маһы иһэн, көөнньөрөн, оҕунуохтанан хара дьайы дьалбарыталларын билэбит эрээри, соччо-бачча хото туһаммаппыт. Тута эмтиэкэлэргэ эмп ыла тиэтэйэбит. Оттон таба туһаннахха, дьиҥэр, айылҕа биэрбитэ киһи ис күүһэ бөҕөргүүрүгэр үтүө дьайыылаах.

Итинник санааны Сунтаар олохтооҕо Зинаида Федотова-Дьол Кыыма тэҥинэн үллэстэр, итиэннэ бэйэтэ хайдах үүнээйинэн доруобуйатын бөҕөргөтөрүн сэһэргиир. Лабыктаны ууга илитэн, онон сайҕаннахха, күөмэй чөллөрүйэр. "Биирдэ култуура үлэһиттэрэ миэхэ лабыкта аҕаллылар, көрөөт тута миэхэ туһалыаҕа дии санаатым, кыргыттар барахсаттар ис сүрэхтэриттэн үтүөнү баҕаран лабыктаны кэһиилэннэхтэрэ. Лабыктаҕа араас иҥэмтиэлээх эттик баарны истэр этим. Ону чиҥэтэн литератураны аахтым, икки ньуоска лабыктаны биир лиитирэ ууга тэптэрэн ыллым. Хабархай амтаннаах буолар, ону күөмэйбин сайҕанным. Олус туһалыыр эбит. Биири чорботон эттэххэ, киһи күөмэйэ ыалдьаары гыммыт буоллаҕына, хабархай амтана кыратык аһытар, салаан ылар, ол аата ыарыытын оборор", – диэн кини санаатын үллэстэр. Бэс иннэтэ эмиэ «ааттаах эмчит» буоларын бэлиэтиир. Бэс тылларын саҕана хомуйар ордук эбит. Ону биир ньуосканы биир лиитирэ оргуйбут ууга кутан кыра кыралаан истэххэ, этиҥ-сииниҥ нукаай курдук буолбута уҕарыйан, сэниэлэнэҕин, эрчимирэҕин диэн быһаарар.

Дьэ аны кунаах тэллэй туһунан кэпсээтэххэ, Зинаида Федотова тэллэйин кыһыйан ылар. Биир остолобуй ньуоскаҕа эмиэ оргуйбут ууну кутан, маарыланы биэс-алта бүк тутан сиидэлиир. Итиэннэ аһыан иннинэ ыстакаан аҥаарынан иһэр эбит. Оччоҕуна хаана убаан, тымырдарынан тыгыалыы сүүрэр. Хоруона ыарыыта хааны бөлүөхсүтэринэн, итинник умнулла сыспыт норуот эмтэнэр ньыматын туһаныахха сөп. Зинаида Федотова өссө биири сүбэлиир, киһи сиргэ-уокка сырыттаҕына, айылҕа тыынын көхсүнэн сэрэйэр, ханнык үүнээйи чопчу киниэхэ туһалыан сөбүн билэр буолар. Ону тэҥэ өрүү үөрэ-көтө сырыттахха, этиҥ-хааныҥ чэбдигирэн, дьаҥ-дьаһах самнарбат буоллаҕа.

Екатерина Аммосова.

Made on
Tilda